Ito Ang Ating Kabataan

Isinulat ni Ezra Thess Guevarra (STIMULI February 2010)

ITO ANG ATING KABATAAN
ni Ezra Thess Guevarra


I

Madaling magtiwala,
Madali rin mawalan ng tiwala.
Sa miminsang sila'y masaktan,
Tila dala-dala hanggang sa walang hanggan.

---

II

Ang iba'y minsa'y nawawalan ng gana mag-aral.
Ang nasa isip kasi ay kasiyahan
Sa huli nama'y maiintindihan,
Ano ang halaga ng pag-aaral.

III

Ang iba'y minsa'y nangungupit,
Ginagamit lang naman pang-gimik.
Maiisip lamang ang halaga ng pera,
Kapag nakita ang paghihirap ng magulang.

IV

Ang iba'y ayaw magmana,
Kung negosyo'y mala-karinderya.
Mapaghangad ng mataas,
Bagama't kulang sa pagsisikap.

V

Ang iba'y kung minsa'y nalilito,
Ang gagawi'y di malaman kung ano.
Tatayo sa sariling paa't magsasarili,
O aasa pa rin sa pamilyang nasa tabi.

---

VI

Ang iba'y mapagmahal na kaibigan,
At mapagmahal na kapatid.
Binabalewala ang kaligayahang pansarili,
Kung ang mga minamahal ang nagigipit.

VII

Ang iba'y itinatago ang katotohanan,
 Para pagtakpan ang kasalanan ng iba.
Di bale ng mapag-isipan ng masama,
Huwag lang kaibiga'y mahusgahan ng iba.

VIII

Ang iba'y madaling uminit ang ulo,
Kaya laging napapasok sa gulo.
Handa rin namang magpakumbaba sa nakaaway,
Kung para sa kaligtasan ng kaibigan.

IX

Ang iba'y kapag totoo ang nadarama,
Lahat ay ginagawa,
Upang protektahan at di makitang lumuluha,
Ang irog na siyang mahal.
Ang iba'y kapag nabigo sa pag-ibig ay nagwawala,
Akala'y katapusan na ng lahat.
Hanggang sa maisip nila,
Pamilya at kaibigan ay nandiyan pa.

---

X

Ang iba'y madalas mapagbintangan,
Sa di ginawang kasalanan.
Madalas husgahan,
Sa panlabas na kaanyuan.

XI

Ang iba'y kapag nilalait na,
Madalas tinatanggap na lang.
Nguni't pag kaibigan ang hinuhusgahan,
Galit ay di mapigilan.

XII

Iba-iba man ng pagkatao,
Iisa lang din ang ninanais ng puso.
Ganyan ang kabataan ng kasalukuyan,
Ganyan ang ating kabataan.