A Photowalk Journey: Manila - Pasay (It's more fun in the Philippines)

4/24/2014

Isinulat ni Lakbay Diwa

Escolta, Manila

It's more fun in the Philippines. It's more fun in Manila and Pasay City.
An adventurous photowalk to the city of Manila and Pasay.

Matapos ang maayos at matagumpay na pagbisita sa La Mesa Eco Park sa Lungsod ng Quezon. Agad kong sinundan ang lakwatsa sa loob lang mismo ng Metro Manila. Napag-desisyunan ko na mag-photowalk sa Lungsod ng Manila at Pasay. Pumatak ang biglaang lakwatsa na ito nang Good Friday, sa paglalakwatsa kong ito nakasama ko ulit si Louie (isa siya sa mga naging travel buddy ko sa pag-akyat sa Mt. Talamitam na matatagpuan sa Nasugbu, Batangas).

Hindi lang kilala ang Manila bilang sentro ng komersyo at kapital ng bansa, sa halip ito din ay mayaman sa kasaysayan. Maraming mahahalagang kaganapan ang nangyari dito mula kapanahunan nang kolonisasyon ng Kastila hanggang sa Ikalawang Digmaang Pandaigdig (WWII/WW2 o World War 2) at maging sa kasalukuyang panahon.

Una naming binisita ang Manila Metropolitan Theater na dinisenyo ni Filipino Architect Juan M. Arellano. Nakakapanghinayang sapagkat nakasarado na pala ito at hindi na namin nasilip ang itsura nito sa loob. May ilang blog kasi akong nabasa na nakapasok pa sila sa loob nito kahit matagal na itong nakasara, siguro kailangan mo yata munang magpa-schedule ng tour o sumama sa ilang tour packages para makapasok sa loob. Nilibot kasi namin ang paligid nito sa pagbabakasakaling may bukas na daan para makapasok kami sa loob. Naka-lock ang ilang gate na may kandado at nakasarado ang mga pinto nang subukan naming buksan ito, sinubukan na lang naming sumilip sa mga bintana at mga siwang nito. Medyo creepy ang dating dahil sa luma na ang gusali nito.

Manila Metropolitan Theater

Pagkatapos naming bisitahin ang Manila Metropolitan Theater ay nagtungo naman kami sa Liwasang Bonifacio at Manila Central Post Office para alamin kung ano ang mga makikita doon. Noong araw na iyon ay kaunti lang ang mga taong namamasyal dito, mga katulad naming ayaw nang lumayo at gusto lang maglibot sa Manila at may sapat na nakalaang budget lamang. Dahil nga sa photowalk ang aming aktibidad ay wala kaming ginawa kundi kumuha ng mga larawan (Street Photography). Binisita din namin ang Binondo Church bago kami magpatuloy sa aming lakwatsa patungong China Town.

Manila Central Post Office

Binondo Church also known as Minor Basilica of St. Lorenzo Ruiz and Our Lady of the Most Holy Rosary Parish

For more images, just click here

Isa din sa mga lugar sa Manila na gusto ko talaga makita at bisitahin ay ang China Town, curious lang kasi ako kung anu-ano ba ang mga makikita doon. Unfortunately, wrong timing din kasi ang biglaang photowalk namin dahil natapat ito nang Good Friday (Holy Week) kaya sarado ang ilan sa mga establishment dito. Ganun pa man, may ilang bukas na mga tindahan at kaininan na karaniwang inihahain ay mga Chinese Delicacy. May mga Chinese Latern din na parang nasa chinese movies. Nilibot lang namin ang lugar sa mga posibleng maging concept namin.

Pagkatapos naming maglibot sa China Town ay nagtungo naman kami sa Intramuros upang muling bisitahin at sariwain ang mga naiwang bagay at alaala ng kasaysayan. Bago kami makarating sa Intramuros ay nadaanan namin ang isa din sa mga kilalang simbahan sa Manila, ito ay ang Sta. Cruz Church. Pinuntahan din namin ang Manila Cathedral na muling binuksan sa publiko matapos isara upang i-maintain ang natural na kagandahan nito. Binisita din namin ang San Agustin Church, kilala din sa orihinal nitong pangalan na "Iglesia de San Pablo" na itinatag noong 1571 sa tulong ng mga Augustinian Friar. Isa ito sa mga idineklara ng UNESCO bilang WORLD HERITAGE SITE noong 1993. Sinubukan din naming bisitahin ang Museum nito ngunit hindi kami umabot sa oras na tumatanggap sila ng bisita. Noong mga oras na iyon ay napakaraming tao sa mga simbahan na dinalaw namin dahil nga sa Good Friday (Holy Week) nung araw na iyon.

Sta. Cruz Church

Manila Cathedral

San Agustin Church

Pagkatapos naming bisitahin ang mga naggagandahang mga simbahan at manalangin para sa mga biyaya na aming natatanggap at humihingi ng tawad para sa aming mga pagkakasala ay muli naming nilibot ang Intramuros, pinuntahan ang mga lugar na hindi pa namin nabibisita. Nagtungo din kami sa Fort Santiago kung saan ikinulong ang ating Pambansang Bayani na si Dr. Jose Rizal ngunit sa hindi inaasahang panahon ay sarado ito. Akala ko muli ko itong mabibisita pero wrong timing. Ilang minuto pa ay nagtungo naman kami sa Rizal Park, medyo madami ding mga tao noong mga oras na iyon dahil sa mga pamilya, magkakaibigan at maging mga magsing-irog na nagba-bonding. Holiday kasi kaya sa tingin ko yun ang pinakamagandang pagkakataon para makapag-bonding sila. Hindi din kami nagtagal sa luneta dahil dumaan lang kami dito. Plano talaga naming sunod na puntahan ay ang Seaside sa MOA dahil sakto na papalubog ang araw. Magandang pagkakataon para makapag-concept kami ng sunset sa Manila Bay. Bago namin marating ang Seaside sa MOA, ilan sa mga lugar na nadaanan at binisita namin ay ang Rajah Sulayman Park, Manila Ocean Park, CCP Complex, Star City at kung anu-ano pa. Pagkatapos nang ilang oras na paglalakad ay maayos naming narating ang seaside sa MOA. Mula dito ay photo ops agad kami. Pagkatapos nang ilang oras na pagtambay, pag-eenjoy at syempre pag-pophoto ops ay umuwi na kami.