Mt. Hapunang Banoi And Espadang Bato: The Unexpected Adventure

Mt. Hapunang Banoi and Espadang Bato: The Unexpected Adventure

2/9/2019

The best things happen unexpectedly. And so the adventure begins.

Isang paalala, hangga't maaari ay mag-stick ikaw o kayo sa itinerary o planong nagawa niyo. Huwag tularan ang nangyari sa amin.

Our itinerary for Mt. Oro and Payaran Falls

Ang Barangay Mascap sa Rodriguez, Rizal ang nagsisilbing jump-off sa ilang hiking destination sa nasabing lugar, kabilang na nga dyan ay ang Mt. Ayaas, Mt. Sipit Ulang (o kung tawagin din ay Mt. Crab's Claw), Mt. Hapunang Banoi, at iba pa.

Oo tama ang nakita mo sa larawan mula sa itaas. Ang adventure sana naming ito ay sa Mt. Oro with side trip to Payaran Falls kaso biglang naiba ang naging lakad namin dahil sa biglaang desisyon. Nasa jump-off pa lamang kami nang mabanggit sa amin ni Kuya Andy (ang aming naging guide) ang tungkol sa Espadang Bato. Syempre, na-curious kaming lahat kung ano yung sinasabi niya. Agad niyang pinakita sa amin ang litrato nito mula sa kanyang cellphone at nabanggit niya doon lang din ang jump off nito Brgy. Mascap.

Walang pag-aalinlangan ay agad napag-desisyunan ng grupo na sa Espadang Bato na lamang ang aming lakad.

Barangay Mascap

Registration Area

Bukang liwayway na noong kami ay tumahak. Kagaya ng ibang bundok, nagsimula muna ang lahat sa pagtahak namin sa sementadong daan bago namin marating ang ilang kabahayan (province feels) na tila senyales na simula ng aming paglalakbay.

Mula sa sementado at pailan-ilang kabahayan na aming dinaanan ay unti-unting nagparamdam samin ang presenya ng kagubatan. Yung mga puno, katahimikan at tanging huni ng mga ibon lamang ang iyong maririnig sa gitna ng paglalakbay.

Ito yung na-miss ko eh! Taong 2016 pa ang huli kong akyat ng bundok at ito ay naganap sa Mt. Cayabu - Mt. Maynoba. Hindi katagalan ay may nadaan kaming ilog na sa tuwing tag-ulan ay tumataas ang lebel ng tubig. Dito din naglalaba ang ilang locals ng kanilang mga damit.

Photo Op bago magpatuloy sa paglalakbay

Sa gitna ng aming paglalakbay ay pumukaw atensyon sa amin ang ilang puno ng Malabulak na napagkakamalan din ng karamihan na Fire Tree (Delonix regia). Tinatawag din ito sa Tagalog na Buboi-gubat o Taglinau. Nakakatuwang pagmasdan ang mga ito lalo na kapag namumulaklak na dahil parang version ito ng Cherry Blossoms.

Malabulak Trees

Pagmasdan maigi ang larawang ito, makikita mo ang isang pugad. Sabi ng aming guide na pugad daw ito ng isang lawin.

Habang kami'y nagpapatuloy sa aming paglalakbay ay nakakuwentuhan namin ang aming guide at aming napag-alaman na ang Espadang Bato pala ay parte mismo ng Mt. Hapunang Banoi at ayon sa aming guide ay 20 to 30 minutes lamang ang layo nito mula sa mismong summit ng Mt. Hapunang Banoi. Sa madaling salita ay Mt. Hapunang Banoi pala ang aming pinapanik at makokonsidera lamang namin na side trip ang Espadang Bato.

Sa aming pagpapatuloy ay unti-unti na nagpapakita sa amin ang mga limestone rocks na tila bagang hinahamon ang aming mga kamay sa mga nagtutulisan nitong mga parte.

Kilala din ang ilan sa mga kabundukan sa Rizal dahil sa mga limestone rocks.

Bago pa man namin marating ang Espadang Bato ay dinala kami ng aming guide sa isang limestone rocks viewdeck nito kung saan matatanaw mo ang ilang karatig bundok katulad ng Mts. Parawagan at Balagbag. Matatanaw din dito ang mga kabahayan sa mga subdivision.

Mt. Balagbag as seen from the limestone rocks viewdeck before Espadang Bato.

At the limestone rocks viewdeck with Mt. Parawagan as my background.

With fellow hikers (Jay, Rommel and Jhanssen)

Ilang minuto din kaming nagpahinga mula dito at hindi na din kami nagtagal. Nagpatuloy na kami patungong Espadang Bato. Along the trail ay pumukaw sa amin ang isang Balete Tree na naging saksi sa kayabungan ng bundok na ito sa loob ng ilang taon.

Balete Tree. Kung iyong pagmamasdan maigi ang larawan na ito, parang may creature ka na mabubuo.

Ilan sa mga wild mushrooms na aming nakita along the trail.

Jackfruit along the trail.

Ilang minuto mula sa Balete Tree ay narating din namin ang tinatawag na Espadang Bato. Kaunting pag-iingat lamang kung nanaisin mong panikin ang itaas nito upang makita ang tanawin at magkaroon ng litrato mula sa itaas dahil masyadong maliit ang space sa tuktok nito at ginawan lamang ng kahoy na magsisilbing upuan mo. May ginawa namang hagdan papanik dito ngunit katulad ng sinabi ko, mag-ingat lalo na kung mahangin dahil maaaring ma-out of balance ka at alam mo na iyong kalalagyan.

Unang pasulyap sa amin ng Espadang Bato.

Looking at Espadang Bato. Noong mga oras na ito ang tanging natanong ko sa aking sarili, papanikin ko ba ito?

Espadang Bato with other limestone rocks.

Rommel with Kuya Andy

Since may isang grupo ang nauna sa amin sa Espdang Bato at nag-po-photo op sila ay napag-desisyunan ng aming grupo na magtungo muna sa summit ng Mt. Hapunang Banoi dahil ilang minuto na lamang ang layo nito mula sa Espadang Bato.

Hindi biro ang trail patungong summit bukod sa nagtutulisang mga limestone rocks ay dagdag pahirap pa ang mga puno ng kawayan na tila hinaharangan kayo sa daan. Kaunting ingat lamang sa mga hahawakang kahoy o anumang bagay along the trail dahil may ilang puno at halaman na maaaring magdulot ng kati.

Ilan sa mga kawayang para bang ayaw kaming padaanin.

Babala: Huwag mong hahawakan ang bagay na ito kung ayaw mong matusok at katihin.

Matapos ang pagpapahirap sa amin ng mga kawayan at mga limestone rocks ay matagumpay naming narating ang summit ng Mt. Hapunang Banoi. Thanks be to God! Solo din namin ang summit kaya nagkaroon kami ng pagkakataon na makapag-isip ng mga bagay-bagay, makapagpahinga at syempre enjoyin ang tanawin.

Katulad ng paulit-ulit kong sinasabi sa mga previous blog posts ko, napakasarap sa pakiramdam yung panandaliang makatakas ka sa ingay ng lungsod. Yung panandaliang iiwan mo ang modernong pamumuhay at makikihalubilo ka sa kalikasan. Yung lalasapin mo ang hangin na walang halong usok na nagmumula sa polusyon. Yung ma-e-enjoy mo ang katahimikan at tanging maririnig mo lamang ay tinig ng mga ibon na tila bagang hinihele ka at gugustuhin mong matulog pangsamantala. Kay sarap!

At the summit of Mt. Hapunang Banoi

Mt. Ayaas as my background. Mt. Lubog as seen from a far left of this picture.

Groupie at the summit.

Wawa River as seen from the summit.

Makalipas ang ilang oras ay bumaba na kami sa summit upang magtungo ulit sa Espadang Bato. Saglit lang din kami ulit nag-stay sa Espadang Bato at agad na kaming bumalik sa jump off dahil may duty pa sa trabaho ang isa naming kasama (ang galing di ba, bundok is life daw).

Maraming Salamat Panginoon sapagkat naging masaya at successful ang adventure naming ito. Maraming Salamat din sa mga nakasama.

Kinakailangan mo din lumabas sa iyong comfort zone. Maaaring ang comfort zone mo ay ang iyong trabaho. Tandaan mo, hindi lang dapat sa trabaho umiikot ang iyong buhay. Kailangan mo din mag-travel o mag-adventure upang ma-relax ang iyong isipan at maisip mo ang ganda ng buhay.